လေးကေကော်တိုက်ပွဲများကြား အသက်ဘေးမှ လွတ်ခဲ့သည့် ဧရာဝတီသားတော်လှန်ရေးသမားတစ်ဦး၏ အတွေ့အကြုံများ

Clicker တို့ ခင်ဗျား c4a ကို click ​ပေးတဲ့အတွက် ​ကျေးဇူးတင်ပါတယ် ခင်ဗျာ ။ ၁၀ စက္ကန့်​နေပြီးရင်ပြန်ထွက်လို့ ရပါပြီ ခင်ဗျာ ။

လေးကေကော်တိုက်ပွဲများကြား အသက်ဘေးမှ လွတ်ခဲ့သည့် ဧရာဝတီသားတော်လှန်ရေးသမားတစ်ဦး၏ အတွေ့အကြုံများ

~~~~~~~~~~~~~~~~~~~~~~~~~~~~~~~~~~

#လေးကေကော်

#စစ်ဘေးဒုက္ခများ

#AyeyarwadyRevolutionNews

အပိုင်း (၁)

မေး ။ လေးကေကော်က တိုက်ပွဲအတွင်း ဆရာတို့ ကြုံတွေ့ခဲ့ရာတာလေးတွေ ပြည်သူတွေကို မျှဝေပေးပါဦးခင်ဗျ။

ဖြေ ။ ——

“အချိန်က ခရစ်စမတ်ရဲ့အကြိုကာလ၊ ကရင်ပြည်နယ် မြဝတီမြို့အနီးက ငြိမ်းချမ်းရေးအထိမ်းအမှတ်အဖြစ် တည်ဆောက်ခဲ့တဲ့ လေးကေ့ကော်ဆိုတဲ့မြို့သစ်မှာ အကြမ်းဖက်စစ်တပ်ရဲ့ အာဏာသိမ်းမှုအပြီး တနိုင်ငံလုံးမှာရှိတဲ့ တက်ကြွလှုပ်ရှားသူတွေ ၊ ၅၀၅ အထုတ်ခံထားရသူတွေ ၊ CDM ဝန်ထမ်းတွေနဲ့ စကစ နှိပ်စက်မှုကြောင့်သွားရောက်ရှောင်တိမ်းနေတဲ့ နေရာလေးတခုပေါ့။ နေရာက KNU တပ်မဟာ ၆ ထိမ်းချုပ် နယ်မြေလည်းဖြစ်ပါတယ်။ စစ်တပ်က အကြောင်းပြချက်တစ်ခုခုပြပြီး လေးကေ့ကော်ထဲမှာ ရှာဖွေမှုတွေ လာလာလုပ်လေ့ရှိပေမယ့် ခုတစ်ခေါက်မှာတော့ သူတို့သတင်းပေးတွေရဲ့လက်ချက်နဲ့ လွှတ်တော်ကိုယ်စားလှယ်နှစ်ဦးကို ဖမ်းဆီရာမှစတင်ပြီး တဖက်နဲ့တဖက် တင်းမာမှုတွေ မြင့်တက်ခဲ့ပါတယ်။ အရင်က မနက်ပိုင်းလာတယ်- ဟိုစစ်ဒီစစ်လောက်နဲ့ပဲ ပြန်ပြန်သွားတော့ အဝတ်တစ်ထည်ကိုယ်တစ်ခု လွယ်အိပ်တလုံးနဲ့ ရှောင်ထွက်လာခဲ့တယ်။ အဲဒီနေ့မှာပဲ တနေ့လုံးစစ်တပ်က ဝင်မွှေနှောက်ရှာဖွေနေတဲ့အတွက် ကျွန်တော်တို့ဟာ မယ်ဝါးခီရွာဘက်ကို ရွှေ့ပြောင်းနေခဲ့ရပါတယ်။

မယ်ဝါးခီးမှာလည်း သက်ဆိုင်ရာက ရှောင်တိမ်းလာသူတွေကို အစားစာတွေကျွေးမွေးပြီး ထားပေးခဲ့ပါတယ်။ အိပ်ဖို့ကတော့ ကွင်းပြင်ထဲမှာ အခင်းတွေခင်းပြီးနေခဲ့ရတယ်၊ ရေလည်း မချိုးရဘူးပေါ့။ ဒီဇင်ဘာ (၁၅) နေ့မှာပဲ စကစတွေက လေးကေ့ကော်မြို့ထဲကို လက်နက်ကြီးနဲ့ စတင်ပစ်ခတ်ပြီး အနီးပတ်ဝန်းကျင်က စခန်းကုန်းတွေကို လက်နက်ကြီးတွေ စပြီးပစ်ပါတော့တယ်။ သူတို့နေရာယူထားတဲ့ အမြှောက်ကုန်းတွေကနေ လက်နက်ကြီးတွေနဲ့ ပစ်ပြီးစစ်ပွဲကို အစပြုပါတော့တယ်။ လေ့ကေ့ကော် နှင့် မယ်ထော်သလေးမှာ တိုက်ပွဲတွေစတင်ဖြစ်တဲ့အခါ ဒေသခံတွေဟာ စစ်ဘေးရှောင်တဲ့အနေနဲ့ မယ်ဝါးခီးဘက်ကို စစ်ဘေးရှောင်ပြေးရပါတော့တယ်။

မြဝတီမြို့ နဲ့ လေးကေ့ကော်မြို့ကြားက မယ်ထော်သလေးမှာ တိုက်ပွဲအပြင်းအထန်ဖြစ်ပြီး စစ်ကောင်စီဟာ အရမ်းအထိနာခဲ့ပါတယ်။ အဲဒီနေ့က KNLA ကနေ စစ်တပ်က ၆ ဦး နှင့် BGFက ၂ ဦးတို့ကိုဖမ်းမိပြီး ဖမ်းဆီးရမိတဲ့သုံပန်းတွေကို လိုက်နာရတဲ့စည်းကမ်းအတိုင်း ကောင်းစွာစောင့်ရှောက်ထားတာကိုလည်း Facebook မှာမြင်တွေရမှာဖြစ်ပါတယ်။ ဒီဇင်ဘာ ၁၆ ရက်နေ့ မှာ မယ်ဝါးခီးစခန်းမှာ ရိက္ခာတွေကိုစုပြီး စစ်ဘေးရှောင်တွေအတွက် စားသောက်ရေးကို ကျနော်တို့ စီစဉ်ပေးခဲ့ပါတယ်။ စစ်ဘေးရှောင်ပြည်သူတွေကို မယ်ဝါးခီးစာသင်ကျောင်း ၊ အနီးနားက ခရစ်ယန်ချက်ကျောင်း နဲ့ ဘုန်းတော်ကြီးကျောင်းတွေမှာ ထားရှိခဲ့ပါတယ်။ လူရာပေါင်းများစွာအတွက် ထမင်းတွေချက်ပြီး ကျွန်တော်တို့အဖွဲ့ ဟာ ထမင်းထုတ်တွေ ဝေငှတဲ့အလုပ်ကို လုပ်ပေးနေခဲ့ပါသည်။ တိုက်ပွဲဟာပိုမိုပြင်းထန်လာမှာကို မိမိတို့သိရှိပြီး ဖလူစစ်ဘေးရှောင်စခန်းကို ဒေသခံပြည်သူတွေ ၊ အမျိုးသမီး ၊ ကလေးတွေကို အရင်ဆုံးဦးစားပေးနေရာရွှေ့ပြောင်းမှုပြုလုပ်ခဲ့ပါတယ်။ ကျွန်တော်တို့အဖွဲကတော့ မယ်ဝါးခီး စာသင်ကျောင်းမှာပဲကျန်နေပြီး ရှေတန်းစစ်မျက်နှာက ရဲဘော်တွေ စားရေးသောက်ရေးအတွက်

လုပ်ကိုင်ပေးနေခဲ့ပါတယ်။

စကစဘက်က လက်နက်ကြီးတွေ အဆက်မပြတ်နဲ့ KNU/KNLA/PDF တွေရှိနေမယ်ထင်တဲ့နေရာတိုင်းကို သူတို့အမြှောက်ကုန်းကနေ ရမ်းသမ်းပစ်နေခဲ့ပါတယ်။ ကျွန်တော်တို့နေရာနှင့် အနည်းဆုံး တစ်မိုင်လောက် ဝေးနေတဲ့နေရာကို လက်နက်ကြီးကျ ပေါက်ကွဲမှုတွေ ဖြစ်နေတာကြားနေရတော့ လက်နက်ကြီးပေါက်ကွဲမှု ဘယ်လောက်ပြင်းထန်မယ်ဆိုတာကို မခန့်မှန်းမိသေးဘူး။ ကြားရတာကြာတော့ရိုးလာသလိုတောင် ဖြစ်လာပါတော့တယ်။ စကစဟာ အထိနာလာတော့ ဒီဇင်ဘာ (၂၄) ညဆယ်နာရီလောက်မှာ စပြီး လေယာဉ်နဲ့ဗုံးလာကြဲပါတယ် အဲဒီမှာ အကုန်ဝရုန်းသုန်းကားဖြစ်ပြီး ကျွန်တော်တို့အဖွဲ့ကတော့ စာသင်ကျောင်းအောက်က ဗုံးခိုလိုရတဲ့

နေရာကိုပြေးကြရပါတယ်။ အဲဒီညတစ်ညလုံး စာသင်ကျောင်းအောက်မှာပဲနေရင်း မိုးလင်းခဲ့ရပါတော့တယ်။

အဲဒီအချိန်မှာ ရှေ့တန်းစစ်မျက်နှာအတွက် ရိက္ခာထောက်ထားတဲ့ စခန်းကနေရွှေ့ပြောင်းဖို့ဆိုတာ ကျွန်တော်တို့အတွက် အခက်ခဲဆုံးပဲ၊ အနီးနားကစခန်းတွေလည်း လေယာဉ်နဲ့ ဗုံးလာကျဲနေတာကို တွေမြင်နေရာတော့ ကိုယ်လုပ်ရမယ်တာဝန်ကို ဆက်လုပ်နေခဲ့ပါတယ်။ အဲအချိန်မှာ ဖုန်းလိုင်းနဲ့ အင်တာနက်လိုင်းတွေအဖြတ်ခံထားရပြီး မြန်မာဆင်းကဒ်တွေအလုပ်မလုပ်တော့ပဲ ထိုင်းကဒ်တွေပဲသုံးလို့ရပါတော့တယ်။”

“ December 25 , Christmas Day “

အင်တာနက်ရတုန်းလေး လိုင်းသုံးရင်း တိုက်ပွဲတစ်ခုအကြောင်းကို ကျနော် ဖတ်မိခဲ့တယ်၊ စစ်သူပုန်

တွေဟာ တိုင်းရင်းသားတွေရဲ့ နေ့ကြီးရက်ကြီးအထိမ်းမှတ်နေ့မျိုးတွေကို ရွေးပြီး ထိုးစစ်လုပ်ဖူးတယ်ဆိုတဲ့ သာဓကတွေကို ဖတ်မိခဲ့တယ်။ အဲ့ထဲက ကျွန်တော်စိတ်ထဲမှာ ထင့်နေခဲ့မိတယ်။ ခရစ်စမတ်နေ့ နံနက် ၁၀ နာရီလောက်မှာပဲ လက်နက်ကြီးတွေ စတင်ပစ်ခတ်ပါတော့တယ်။ ထူးခြားတာက အရင်လို တစ်လုံးစနှစ်လုံးစ ပစ်ခတ်တာမဟုတ်တော့ပဲ သုံးလေးလုံးတပြိုင်တည်း အတွဲလိုက်ပစ်ခတ်လာပါတော့တယ်။ ကျွန်တော်တို့တည်ရှိတဲ့ စာသင်ကျောင်းအနီးဆုံးနေရာ ကိုက် (၅၀၀) လောက်အထိကို လက်နက်ကြီးကျ ပေါက်ကွဲမှုတွေ ဖြစ်လာပါတော့တယ်။ ကျွန်တော်တို့နေရာနဲ့အရမ်းနီးကပ်လာပြီး ပစ်ခတ်တာလည်း အလုံးပေါင်းများစွာ ဆက်တိုက်ပစ်ခတ်လာတဲ့အတွက် ပထမဆုံး စစ်ဘေးရှောင်ပြည်သူတွေ အတွက် စိတ်ပူပန်မှုတွေ စတင်ဖြစ်လာပါတယ်။ သူတို့အမြှောက်ကုန်းလေးနေရာလောက်မှာ လက်နက်ကြီးတွေ တပ်ဆင်ထားတာကို ကျွန်တော်တို့လည်းသိထားတာ ဖြစ်တဲ့အတွက် ဆုတ်ဖို့ကိုပဲ ပြင်ဆင်ထားလိုက်တော့တယ်။

(ဆက်ရန် - )

အပိုင်း (၂)