ငါစောင့်နေမယ် သူငယ်ချင်း

 “ငါစောင့်နေမယ် သူငယ်ချင်း”

***************************

မအူပင်မြို့UGတစ်ဦးမှပေးပို့သည်

ARNs_Revolutionary_Art_Program 

လမ်းကြုံလို့ ဆန္ဒပြခဲ့ကြသူတွေကိုတော့ 

မပြောလိုဘူး သူငယ်ချင်းရေ…

ရင်ဘတ်ချင်းမတူလို့ တစ်ချို့မိတ်ဆွေတွေကို 

ဥပေက္ခာပြုလိုက်တာ ကြာခဲ့ပြီး။

နာကြင်မှုတွေကို ကဗျာအဖြစ်ထုဆစ်ရင်း 

လွမ်းချင်းတွေကို သီချင်းတွေနဲ့

ဖြေဖျောက်ခဲ့ရတဲ့ညတွေဟာ ထုနဲ့ဒေး။

ငါအိမ်ကို လွမ်းတဲ့အကြောင်း

အမေ့ကို သတိရကြောင်း

ကျန်းမာရဲ့လားအမေ ဆိုတဲ့စကား

အရင်ကမသိ၊ မပြောခဲ့ပေမယ့်အခုမှ

တန်ဖိုးတွေ သိနေပြီး  အမေ။

အဝေးက ငါ့မြို့လေး  

တိတ်တိတ်လေးလွမ်းနေတယ် 

မီးကမမှန်၊ခြင်ကိုက်ပေမယ့် 

တစ်ကယ်တော့ သတိရနေတယ်ဗျ။

ငါလုပ်နေကျအလုပ်ကိုလည်း လွမ်း

ငါသွားထိုင်နေကျဆိုင်က

လ္ဘက်ရည် ကျစိမ့်တစ်ခွက်ကိုလည်း လွမ်းနေရဲ့။

အပေါင်းအသင်းတွေနဲ့ဝိုင်းဖွဲ့ 

တောင်ထိပ်ကဘီယာ အေးအေးလေး 

ငါ့ကိုများ လွမ်းနေကြရဲ့လား။

အခုတော့ဗျာ

ဒေါနမြေတောင်ပေါ်တစ်ခွင်က 

ကိုယ့်ရဲဘော်တွေ နေများကောင်းရဲ့လား၊ 

အစဉ်ပြေကြပါစေလို့

စာနာခြင်းတွေနဲ့နှစ်သိမ့်ရင်း 

တော်လှန်ရေးကြီးပြီးတဲ့အခါ 

ဘဝရဲ့အချိုးအကွေ့မှာ 

အာဏာမက်မောသူကြောင့် ရင်းခဲ့ရတဲ့ဘဝတွေကို 

ရီစရာအဖြစ် ပြန်ပြောကြမယ့်နေ့ကို

ငါ စောင့်နေမယ် သူငယ်ချင်း... ။

ရွှေကရင်(မအူပင်)