ကျောင်းခန်းထဲက မအလရဲ့ ကျိန်စာသင့်ခဲ့ရသူများ

ကျောင်းခန်းထဲက မအလရဲ့ ကျိန်စာသင့်ခဲ့ရသူများ

************************************************

စလားဖန်း 

ARNs_Revolutionary_Art_Program 

တော်လှန်ရေးဆောင်းပါးတိုကဏ္ဍ

 

"တရားမျှတလွတ်လပ်ခြင်းနဲ့မသွေ တို့ပြည်..တို့မြေ...

များလူခပ်သိမ်း ငြိမ်းချမ်းစေဖို့ ခွင့်တူညီမျှ ဝါဒဖြူစင်တဲ့ပြည် တို့ပြည် တို့မြေ...

ပြည်ထောင်စုအမွေ အမြဲတည်တန့်စေ အဓိဌာန်ပြုမလေ ထိန်း သိမ်း စို့ လေ" 

ဒီသီချင်းကို တစ်ချိန်က စာသင်ကျောင်းရဲ့ အလံတိုင်ရှေ့မှာ ဆိုခဲ့တုန်းကအချိန်လေးကို သတိရမိသွားတယ်။

အဲ့ဒီတုန်းကတော့ ဘာမှန်းမသိ လိုက်ဆိုခဲ့တာ ခုပြန်တွေးကြည့်တော့ အဲ့ဒီအပိုဒ်လေးထဲမှာ အဓိပ္ပါယ်တွေစုံလို့ပါလား။

လွတ်လပ်ပြီးတရားမျှတမှုရှိရေး၊ ငြိမ်းချမ်းရေး၊ တန်းတူညီမျှမှု ရှိတဲ့ ဝါဒကိုကျင့်သုံးရေး စတဲ့ အကြောင်းအရာတွေကို စာပိုဒ်လေးတစ်ပိုဒ်ထဲနဲ့ ပြည့်စုံအောင်ရေးသွားခဲ့တာ အရမ်းကိုလေးစားဖို့ကောင်းတယ်။

ဒါပေမယ့် ဟိုးငယ်ငယ်လေးထဲက ကျောင်းမှာ နေ့တိုင်းရွတ်ဆိုလာခဲ့ပေမယ့် ခုခေတ်ချိန်ထိ နိုင်ငံတော်သီချင်း စာသားထဲကလိုမျိုး မနေခဲ့ရဖူးဘူး။

လွတ်လပ်ပြီးတရားမျှတတဲ့ ဘဝမျိုးလည်းမနေခဲ့ရဖူးဘူး ငြိမ်းချမ်းရေးဆိုတာလည်း တိုင်းရင်းသားဒေသတွေမှာ အရာရာက နတ္ထိပါပဲ တန်းတူညီမျှမှုဆိုတာကတော့ ဝေးလာမှဝေးနေရောပဲ။

တိုင်းပြည်တစ်ပြည်ရဲ့ အနာဂတ်က စာသင်ခန်းထဲက ကလေးငယ်လေးတွေပါပဲ။ တစ်ချို့နိုင်ငံတွေမှာဆို ကျောင်းနေအရွယ် ခလေးတွေကို တိုင်းပြည်ရဲ့အနာတ်လို့ သတ်မှတ်ပြီး အစိုးရက လိုအပ်တဲ့ထောက်ပံ့မှုတွေ တာဝန်ယူမှု တာဝန်ခံမှုအပြည့်နဲ့ ကာကွယ်စောင့်ရှောက်ပေးကြတယ်။

ဟိုတစ်လောက ကျုပ်တို့တိုင်းပြည်က မအလ ကြီးပြောတာကြားလိုက်ပါသေးတယ် ကျုပ်တို့တိုင်းပြည် ပညာတတ်တွေနဲလို့ ဆင်းရဲရတာဆိုပဲ

ဒီစကားကြားရတော့ တော်တော်လေး စိတ်ထဲ အော်ဂလီဆန်သွားခဲ့ရတယ်။

ကျောင်းတွေကိုအတင်းပြန်ဖွင့်၊ ကျောင်းသားမိဘတွေကိုအစည်းဝေးခေါ်၊ အတင်းကျပ်ခလေးတွေကို ကျောင်းတတ်ခိုင်းပြီး ကျောင်းသားတွေ စာသင်ခန်းထဲရောက်တဲ့အချိန် အစုလိုက်အပြုံလိုက် သတ်ပစ်မယ် ပြီးရင် PDF တွေလုပ်တာပါဆိုပြီး အာဗြဲကြီးနဲ့ အော်မယ် (သူတို့တွေရဲ့ မြေးမြစ်တီတွတ် ဂျွတ်ပလွတ်) ကောင်တွေကိုတော့ အစိုးရပိုင်ကျောင်းတွေမှာ တစ်ကောင်မှ မထားကြဘူး။

ခုတော့ သူတို့ရည်ရွယ်ထားသလို တကယ်လည်းလုပ်သွားခဲ့တယ်။ ဒီလောက်ထိယုတ်မာရိုင်းစိုင်းတဲ့ အပြုမှုမျိုးကို လုပ်နိုင်တာ ကျုပ်တို့မြန်မာပြည်မှာ မအလ တစ်ကောင်ပဲရှိတယ်။

🩸 ခုတော့ ကျောင်းစာသင်ခန်းတွေမှာ ကျောင်းတတ်ခေါင်းလောင်းသံအစား သေနတ်သံတွေကြားခဲ့ရပြီ၊ 

🩸 နိုင်ငံတော်သီချင်းသံအစား ကလေးတွေရဲ့ အော်ဟစ်ငိုကြွေးသံတွေ ကြားခဲ့ရပြီ၊ 

🩸 သန့်ရှင်းလှပပြီး သင်ထောက်ကူ ပစ္စည်းတွေကပ်ထားတဲ့ ကျောင်းနံရံတွေပေါ်မှာ ခုတော့သွေးကွက်တွေအဖြစ် မြင်တွေ့ခဲ့ကြရပြီ၊ 

🩸 အမေထည့်ပေးလိုက်တဲ့ ထမင်းဘူးလေးတွေကလည်း ကြမ်းပြင်ပေါ်မှာ ပြန့်ကျဲကုန်ပြီ၊ 

🩸 စာအုပ်တစ်ချို့ကလည်း မီးတွေစွဲလောင်နေလို့ ကျောင်းဝန်းတစ်ခုလုံးလည်း အရင်က မွှေးပျံ့နေတဲ့ ပန်းနံ့တွေအစား ခုတော့ ယမ်းနံ့တွေနဲ့ ဖုံးလွှမ်းလို့နေခဲ့ပြီ 

🩸 အဝေးကနေ လှမ်းပြီးကြည့်ရင် အင်မတန်မှ ကျက်သရေရှိတဲ့ ကျောင်းဆောင်ကြီးဟာ ခုဆို သုသာန်ကြီးလို ခြောက်ခြားဖွယ် တိတ်ဆိတ်သွားခဲ့လေပြီ…..

ဒါတွေဟာ ဘယ်သူ့အပြစ်လဲ? ဘယ်သူလုပ်ခဲ့တာလဲ? နိုင်ငံတကာကရော ဒီလောက်ယုတ်မာတဲ့ သူတွေကို ဒီတိုင်းပဲ ကိုယ်နဲ့မဆိုင်လို့ လက်ပိုက်ကြည့်နေကြအုံးမှာလား? လူယုတ်မာတွေကတော့ ယုတ်ပြီးရင်းဆက်ယုတ်နေကြအုံးမှာပဲ။ ကမ္ဘာပေါ်မှာ ရှိတဲ့ ဘုရားတွေကရော ဒီလိုယုတ်မာရိုင်းစိုင်းတဲ့ သူတွေကို အလွတ်ပေးထားတုန်းပဲလား…..

ခင်ဗျားတို့မှာလည်း သားသမီးလေးတွေရှိမှာပါ…ခင်ဗျား တို့ခုလို လုပ်ခဲ့တဲ့အပစ်တွေကြောင့် ခင်ဗျားတို့ရဲ့ သွေးသားတွေ ငိုသံကြားတိုင်း ခင်ဗျားတို့ရဲ့ ရင်နှစ်ခြမ်းကွဲလောက်တဲ့အထိ ခံစားကြရပါစေလို့ ရှိရှိသမျှ ဘုရားရှင်အကုန်လုံးကို ရည်စူးပြီး သစ္စာဆိုလိုက်ပါရစေ…..