တစ်ဝက်တပြက်တော်လှန်ရေးများမှသည် ဆုံးခန်းတိုင် တော်လှန်ရေးဆီသို့

 တစ်ဝက်တပြက်တော်လှန်ရေးများမှသည် ဆုံးခန်းတိုင် တော်လှန်ရေးဆီသို့

******************************************

ဘုန်းတေဇာမင်း

ARNs_Revolutionary_Art_Program 

တော်လှန်ရေးဆောင်းပါးတိုကဏ္ဍ 

တော်လှန်ရေးဟူသည် မတရားမှုဟု ယူဆသော အရာအားလုံးကို ဆန့်ကျင့်ရေးဖြစ်သည်။ တော်လှန်ရေးသမားဟူသည် မတရားမှုကို လက်သင့်မခံသော သူဖြစ်သည်။ တော်လှန်ရေးဟု သုံးနှုန်းလိုက်ပြီဆိုလျှင် လက်နက်ကိုင်ခြင်းသည် အဓိကပင်မဟုတ်သော်လည်း ယေဘုယျအားဖြင့် တော်လှန်ရေး၏ င်္အဂါရပ်တစ်ခုကဲ့သို့ ဖြစ်ချေသည်။

ကမ္ဘာအရပ်ရပ်တွင်လည်း တော်လှန်ရေးပေါင်းစုံရှိခဲ့သည်။ အောင်မြင်လူသိများသော တော်လှန်ရေးများ ရှိခဲ့သလို မအောင်မြင်သောတော်လှန်ရေးများလည်း ရှိခဲ့သည်။ မြန်မာပြည်တွင်လည်း ခေတ်အဆက်ဆက် တော်လှန်ရေးများ ရှိခဲ့ပါသည်။  ကုန်းဘောင်ခေတ် နှောင်းပိုင်းတွင်လည်း အပျော်အပါးဖြင့်သာ အချိန်ကုန်နေ သော နောင်တော်ပုဂံမင်းကို မင်းတုန်းမင်းနှင့် ကနောင်မင်းညီနောင်တို့က ရွှေဘိုသို့ ထွက်ခွါ၍ လက်နက်စွဲကိုင်တော်လှန်ရေးပြုလုပ်သည်မှသာ အောင်မြင်မှုရခဲ့သည်ဖြစ်သည်။ ၁၁၂၄ ခုနှစ် ပြာသိုလဆန်း၈ရက်နေ့မှ စတင်ခဲ့သည့် မင်းတုန်းမင်းညီနောင်တော်လှန်ရေးသည်  ၅ လအကြာ ၁၁၂၅ ခုနှစ်တွင်မှ ပြီးဆုံးတိုင်ခဲ့သည်။ မင်းတုန်းမင်းခေတ်တွင် ရတနာပုံခေတ်ဆိုသည့်အတိုင်း မြန်မာပြည်၏ အလားအလာကောင်းများကို ခေတ္တမျှ မြင်တွေ့ခဲ့ရသည်မှာ မင်းတုန်းညီနောင်တော်လှန်ရေးကြောင့်ဖြစ်သည်။

ထို့နောက်တွင်လည်း မြန်မာပြည်တွင် နယ်ချဲ့အင်္ဂလိပ်ကို သူ့ကျွန်မခံတော်လှန်ရေးစစ်ပွဲများ ပြုလုပ်ခဲ့ကြပြီး နောက်ဆုံး ဗိုလ်ချုပ်အောင်ဆန်းနှင့်အတူ ရဲဘော်သုံးကျိပ်တို့၏ ဦးဆောင်တော်လှန်ရေးဖြင့် ၁၉၄၈ ခုနှစ်တွင် ဗမာပြည်လွတ်လပ်ရေးရခဲ့သည်။

လွပ်လပ်ရေးရပြီးနောက်ပိုင်းတွင်လည်း ၁၉၆၂ အာဏာသိမ်းမှုနောက်ပိုင်းတွင် အာဏာရှင်တော်လှန်ရေးများဆက်တိုက်ဖြစ်ပွါးခဲ့သည်မှာ ယနေ့ ၂၀၂၁ အာဏာသိမ်းမှု၏ နွေဦးတော်လှန်ရေးအထိပင် ဖြစ်သည်။ 

ဗမာပြည်သူလူထုမှာ တော်လှန်ရေးနှင့် မစိမ်းတော့ဟုပင် ပြောရမည်ဖြစ်သည်။ ယနေ့ခေတ်နွေဦးတော်လှန်ရေးသည် ၁၉၆၂ နောက်ပိုင်းတွင် အားအကောင်းဆုံးသော တော်လှန်ရေးတစ်ရပ်ဟုပင် ဆိုနိုင်ပါသည်။

တော်လှန်ရေးတိုင်းတွင်လည်း အားနည်းအားသာချက်များရှိမည်ပင်ဖြစ်သည်။ သို့သော် နောက်ဆုံးပိတ် အောင်မြင်ခြင်းမအောင်မြင်ခြင်းသည်သာ အဆုံးအဖြတ်ဖြစ်သည်။ ယနေ့တော်လှန်ရေးသည် ဆုံးခန်းမတိုင်သေးပါ။ ပြုပြင်လို့ရသေးသည်ဟု မြင်သည်။ သမိုင်းကို ရေးထိုးနေသော တော်လှန်ရေးဖြစ်သည်။ 

ယနေ့ခေတ်နွေဦးတော်လှန်ရေးသည် မြန်မာပြည်၏ အာဏာရှင်စနစ်ကို ဆုံးခန်းတိုင် တိုက်ထုတ်နိုင်အောင် ပြည်သူတစ်ရပ်လုံးက စွမ်းဆောင်ရမည်ဖြစ်သည်။ 

တော်လှန်ရေးသည် ရေတွင်းတူးရင်း ရေကြည်သောက်ဖို့မဟုတ်၊ နောင်လာနောက်သားတို့၏ အကျိုးသက်သက်သာ ဖြစ်သည်ဆိုသည့်အတိုင်း လူငယ်များမှာ ဘဝနှင့်ရင်းကာ တော်လှန်နေသည့်အလျှောက် မိဘပြည်သူများမှာလည်း နိုင်ရာတာဝန်ထမ်းဆောင်ရမည်ဖြစ်သည်။ နယ်ချဲ့ဆန့်ကျင်ရေးခေတ် တူယှဉ်ကာလေ စစ်သီချင်းထဲက ဗမာမှန်ရင် ဓားကိုဆွဲလို့ ထွက်ဖို့တော်ပြီလေဆိုသည့် စာသားအတိုင်းယနေ့အချိန်မှာ ကျရောက်နေပြီဖြစ်သည်။ လူကြီးလူငယ်မရွေး လက်နက်ဆွဲကိုင်တော်လှန်ရမည့်အချိန် ဖြစ်နေပေပြီ။ လက်နက်စွဲကိုင်တော်လှန်ရေးသည် အန္တရာယ်များသည်မှာ အမှန်ဖြစ်သည်။ အလွန်ဆုံးအသက်ပင်လျှင် ပေးဆပ်ရမည်ဖြစ်သည်။ သို့သော် နောင်လာနောက်သားအရေးကိုသာ ရှေးရှုပြီး ပြတ်ပြတ်သားသားလုပ်သင့်သည်ကို လုပ်ရမည်သာ ဖြစ်တော့သည်။ 

ယခုပင်လျှင် ပြည်သူလူထုမှာ အခက်အခဲအပေါင်းစုံနှင့်  ကြုံတွေ့နေရသည်ဖြစ်ရာ လောက၌ လူတိုင်းသည် နှစ်ခါမသေနိုင်ပါ။ အဆုံးသတ်တိုက်ပွဲအတွက် ပြည်သူအားလုံးလက်တွဲညီညီ အစွမ်းကုန်ကြိုးစားကြရပါမည်။ ရဲရဲတောက်ဒို့ဗမာတွေ ဖြစ်ကြောင်း သက်သေပြဖို့လိုပါပြီ။ တိုင်းရင်းသားများမှာ အထွေအထူးပြောစရာမလိုတော့ပါ။ ဒို့ဗမာများမှာ အပျော်အပါးအသောက်အစားလျော့လို့ တာဝန်ရှိသော တာဝန်သိသော လူမျိုးများပီပီ ကြိုးစားကြဖို့ အချိန်မနှောင်းမှီတိုက်တွန်းလိုက်ရပါတော့သည်။

ဘုန်းတေဇာမင်း

#B #S