တိုင်းဧရာတွင်းမှ UG တစ်ယောက်၏ ပြည်သူများသို့ ပေးပို့သော သဝဏ်လွှာ

 တိုင်းဧရာတွင်းမှ UG တစ်ယောက်၏ ပြည်သူများသို့ ပေးပို့သော သဝဏ်လွှာ

။။။။။။။။။။။။။။။။။။။။။။။။။။။။။။။။။။။။။။။။။။။။။။

အပိုင်း- ၁

ရဲဘော်စလားဖန်းမှပေးပို့သည်

ARNs_Revolutionary_Art_Program 

ဧရာဝတီက(UG)တွေရဲ့ ဖြတ်သန်းနေရတဲ့ဘဝအကြောင်းလေးတွေကို ကျုပ်တို့ရဲ့ဧရာဝတီက ပြည်သူတွေ တစ်စေ့တစ်စောင်း သိရအောင်လို့ ချပြလိုက်ပါတယ်။

ခပ်နွမ်းနွမ်း ကျောဘိုးအိတ်တစ်လုံးထဲမှာ အဝတ်အစား သုံးလေးစုံလောက်ထည့်၊ ​ပြီးရင် နယ်တစ်ကာလှည့်ပြီး ခိုလှုံစရာနေရာတစ်ခုအတွက် ရှာပုံတော်ဖွင့်ရပြန်တာပေါ့။

ခိုလှုံခွင့်ရပြီဆိုပြန်တော့လည်း ကျုပ်တို့ကို ခို့လှုံခွင့်ပေးကြတဲ့ ပြည်သူတွေရဲ့ နေရာ(သို့မဟုတ်) အိမ်ရဲ့ မိသားစုတွေအတွက်  ကိုယ့်ကြောင့်တစ်ခုခုဖြစ်မှာ အစစအရာရာ စိတ်ပူရပြန်တယ်။

သွေးမတော်သားမစပ်ပါပဲနဲ့ (မအလ) ကိုမုန်းတဲ့စိတ် အာဏာရှင်ကိုမလိုလားတဲ့ စိတ်တစ်ခုထဲနဲ့ ကျုပ်တို့တွေက အရင်တုန်းက လူဆိုးဖြစ်ဖြစ် လူကောင်းဖြစ်ဖြစ် ဘာတစ်ခုမှမတွေးပဲ အမှန်တရားတစ်ခုအတွက် တိုက်ပွဲဝင်နေကြပါလားဆိုတဲ့အသိစိတ်တစ်ခုထဲ နဲ့ လက်ခံပြီး စောင့်ရှောက်ပေးခဲ့ကြတယ်။

တစ်ချို့ခိုလှုံခဲ့ဖူးတဲ့ အိမ်ရှင်တွေဆို သူတို့အိမ်ကနေ တခြားနေရာတစ်ခုကို ရွေ့ရတော့မယ်ဆိုရင် ကိုယ်တွေမသိအောင် ကိုယ့်ရဲ့ကျောဘိုးအိတ်လေးထဲ အစစအရာရာလိုအပ်ရင်သုံးဖို့ဆိုပြီး ပိုက်ဆံလေးတွေ ထည့်ပေးလိုက်ကြတယ်။ (မျက်ရည်ပါကျမိပါတယ်)

ကိုယ်နဲ့သွေးမတော်သားမစပ်ပဲနဲ့ သားသမီးအရင်းတစ်ယောက်လို လိုလေသေးမရှိ ရက်ပိုင်းလောက်လေးပြုစုစောင့်ရှောက်ပေးခဲ့ကြတဲ့ ခိုလှုံခဲ့ဖူးတဲ့မိသားစု ဝင်တွေအားလုံးရဲ့ကျေးဇူးတရားတွေကို ကျုပ်တို့မသေခဲ့ရင် ကျေးဇူးပြန်ဆပ်ခွင့်ရချင်ပါတယ်။

ဒီလိုနဲ့လှုပ်ရှားသွားလာနေရင်း အသိတစ်ခုရလာခဲ့တယ်။ အော်•••သူတို့တွေလည်း ဘယ်လောက်တောင် မအလ အာဏာရှင်ကို မုန်းတီးနေကြလဲဆိုတာ ပိုပီးခံစားမိခဲ့တယ်။ ကိုယ်နဲ့သွေးမတော်သားမစပ်ပါပဲနဲ့ အန္တရာယ်ရှိမှန်းသိသိကြီးနဲ့ ကိုယ်တွေကို အစစအရာရာ ခေတ္တခဏ စောင့်ရှောက်ပေးခဲ့ကြလို့ ညအိပ်ယာဝင်တိုင်း ရှိခိုးပြီးမေတ္တာပို့သလျှက်ပါ။

ကျုပ်တို့ဧရာဝတီကပြည်သူတွေက များသောအားဖြင့် မတတ်သာလို့သာ ငြိမ်နေကြရတာပါ အရေးကြုံလာတဲ့အခါ သွေးနှီးကြတယ်ဆိုတာ ကိုယ်တွေ့ကြုံမှ ပိုပြီးသိလာခဲ့ရတယ်။ 

ကဲတော်လှန်ရေးကြီးပြီးသွားတဲ့ တစ်နေ့ကြရင်တော့ ဧရာဝတီကပြည်သူတွေဘယ်လောက်ထိ ချစ်ဖို့ကောင်းလဲဆိုတာကို စာတွေအရှည်ကြီးချရေးပြအုံးမှာပါ ခုတော့စာတွေအရှည်ကြီးရေးပြလို့အဆင်မပြေလို့ ဧရာဝတီထဲက (ug)တစ်ယောက်ရဲ့ဖြတ်သန်းရပုံကို အနည်းအကျဥ်းမျှသာ  ဖော်ပြပေးလိုက်ပါတယ်။

စလားဖန်း