ခေတ်ကိုပြောင်းအောင် ခေါင်းကိုပစ်ချင်ကြတဲ့ ခေါင်းကြီးတို့ရဲ့ တပ်တွင်းအခြေအနေ

 

ခေတ်ကိုပြောင်းအောင် ခေါင်းကိုပစ်ချင်ကြတဲ့ ခေါင်းကြီးတို့ရဲ့ တပ်တွင်းအခြေအနေ

*********************************************

Photo Credit

#ဖြစ်ရပ်မှန်ဆောင်းပါးတို

တလောက စီနီယာ အရာခံဗိုလ် RSI ကြီး တစ်ယောက် ကယားမှာ ဒွမ်သွားတော့ မိသားစုက လိုင်းခန်းကနေ အချိန်စေ့လို့ ဆင်းပေးရတဲ့အခါ မယားလုပ်သူက ကလေးတွေနဲ့ ရွာပြန်မယ်ပေါ့။

တပ်အပြင်ရောက်မှ မိဘတွေကို ဖုန်းနဲ့ လှမ်းဆက်သွယ်တော့ ရွာလဲ ပြာကျသွားပြီ၊ အိမ်လဲ မရှိတော့ဘူး၊ နင့် တူတစ်ယောက်လဲ နင်တို့ စခတွေ သတ်လို့ သေတဲ့သူတွေထဲ ပါသွားပြီ၊ နင်လဲ တစ်သက်လုံး ဘယ်တော့မှ ပြန်မလာခဲ့နဲ့၊ နင်တို့တွေနဲ့ အမျိုးဆိုတာတောင် ရှက်လှပြီ၊ နင့်ဟာနင်သာ ရှာစားတော့ လို့ မိဘတွေက ဒေါသအပြည့်နဲ့ ပြောပြီး ဖုန်းချသွားပါလေရော။ ထပ်ဆက်တော့လဲ မကိုင်တော့ဘူး တဲ့။

ကလေးတွေ တစ်အုပ်နဲ့ ရွာလဲ ပြန်လို့မရတဲ့ မယားဖြစ်သူဟာ ကြူကြူပါအောင် ငိုရင်း တပ်ထဲ ပြန်ဝင်နေဖို့ တပ်ဂိတ် ပြန်ရောက်လာရတော့တယ်။ ပြဿနာက ဂိတ်က ပေးမဝင်တော့ဘူး၊ အဲ့မှာတင် စွေ့စွေ့ခုန် ဒေါသတွေ ပေါက်ကွဲပြီး တပ်ရှေ့မှာ ဆဲဆိုပတ်ကြမ်းတိုက်ပါလေရော။ တပ်ဂိတ်က တပ်ရေးဗိုလ်ကြီးကို အကြောင်းကြားတော့ အဲ့တပ်ရေးဗိုလ်ကြီးက ရဲစခန်းကို ဖုန်းဆက်ပြီး လာဖမ်းခိုင်းလိုက်တယ်။ ရဲကလည်း တပ်ကခိုင်းတော့ လာဖမ်းရတော့တာပေါ့။

ညနေ တပ်ရင်းမှူး အစည်းအဝေးက ပြန်လာတော့ သတင်းကြားရော၊ သူလဲ ဘယ်လိုလုပ်ရမှန်း မသိဘူး။ ဗျူဟာမှူးကို တွေ့ခွင့်တောင်း လူချင်းသွားတွေ့ပြီး အဖြစ်အပျက်ကို ပြောပြတော့ ဗျူဟာမှူးဟာ စကားပြန်မပြောနိုင်ဘဲ မှင်တက်ပြီး သူ့ရှေ့က စားပွဲကြီးကို တွေတွေကြီး စိုက်ကြည့်နေတာ တစ်နာရီလောက် ကြာတယ်တဲ့။

ငါတို့ သောက်တလွဲတွေတော့ ဖြစ်နေပြီ၊ ငါလဲ ဘာလုပ်ပေးရမှန်း မသိတော့ဘူး၊ လောလောဆယ်တော့ မင်းတို့တွေ RSI ကြီး မိန်းမကို ရဲစခန်းက သွားပြန်ထုတ်လိုက်ကွာ၊ ပြီးရင် လှည်းကူးက ငါ့ခြံထဲ သွားပို့ပြီး လောလောဆယ် နေခိုင်းထားလိုက် တဲ့။

မနေ့က မိတ်ဆွေတစ်ဦးပြောပြတဲ့ အဖြစ်မှန်ကို ကြားလိုက်တဲ့အတိုင်း ပြန်ပြောပြလိုက်တယ်။

မြတ်ထွန်း