ကိုပိုသို့

“ကိုပိုသို့”

~~~~~~

[တော်လှန်ရေးရှေ့တန်းတစ်နေရာတွင် တိုင်းပြည်အတွက် အသက်ပေးဆပ်ခဲ့သော ငပုတောမြို့နယ်ရှိ ကျောင်းဆရာ၊ကဗျာဆရာမောင်ပိုအား မှတ်တမ်းတင် ဂုဏ်ပြုရေးဖွဲ့သည်။]

ကိုပိုသို့

******

အမှန်တရားက ခါးတယ် ကိုပို

ကိုပိုဟာ မြို့ကိုမပြန်ချင်ကြောင်း

အမှန်တရားတွေချပြပြီး နှုတ်ဆက်သွားတယ်။

မြတ်မော်တင်က သူနှုတ်ဆက်တာ

လက်ခံရရှိကြောင်း အကြောင်းပြန်တယ်

အလုံဒီပါရုံက ဝမ်းနည်းကြောင်း

သဝဏ်လွှာထုတ်တယ်။

ကိုပိုဟာ ကျောင်းဆရာတစ်ယောက်

မြေဖြူတွေနဲ့ ဇာတိကို ဦးညွှတ်တယ်။

သူ့ဝတ်စုံမှာသွေးစွန်းခဲ့ပေမဲ့

သူ့ ဝိညာဥ်ဟာ လှပတယ်။

တံတားထိပ်က တွန်းချတဲ့လူတွေအကြောင်း

လက်ဘက်ရည်ဆိုင်က အငြင်းပွါးသံတွေ‌အကြောင်း

ခင်ဗျားက ကျုပ်တို့မှတ်မိအောင် 

မြေဖြူတွေနဲ့ ထားခဲ့တယ်။

သင်္ဘောဥဩဆွဲသံလောက်ကိုသာ

ဆူညံမှုလို့ သိတဲ့လူတွေကြား

ခင်ဗျားဟာ 

ပြန်မလာချင်းနဲ့  ဆူညံမှုတွေအကြောင်း 

သိအောင်ပြောသွားတယ်။

ကိုပို

ခင်ဗျားပြန်မလာချင်တဲ့မြို့လေး

ပြန်လာချင်စိတ်တွေပေါက်အောင်

ကျန်ခဲ့တဲ့ ကျွန်တော်တို့

ကြိုးစားပါရစေ။

ချစ်တယ် ကိုပို

ခင်ဗျားက တောက်ပတဲ့ကြယ်တစ်ပွင့်ပါ

အဖြူအစိမ်းနဲ့ မြေဖြူကိုင်ထားတဲ့

ခင်ဗျားရဲ့ရုပ်ပုံ ခင်ဗျား ပြန်မလာချင်တဲ့မြို့လေးမှာ

ကျုပ်တို့ထွင်းထုပါရစေ ကိုပို....။

ARNs_Revolutionary_Art_Program 

တော်လှန်ရေးစာပေအနုပညာကဏ္ဍ

ညီမျှခြင်း(ဧရာဝတီ)

#ZY #S