ပိုက်ဆံအတုအစစ်ပြဿနာ

 ပိုက်ဆံအတုအစစ်ပြဿနာ

*************************

ကာလပေါ်ဆောင်းပါးတို

ဘုန်းတေဇာမင်း

ယခုရက်ပိုင်းတွင် ပိုက်ဆံအတုအစစ်ဆိုပြီး မိမိတို့ ကိုင်ဆောင်ထားသော ငါးထောင်တန်၊ တစ်သောင်းတန်များအပေါ်  စိုးရိမ်မကင်းဖြစ်နေသော ပြည်သူအများစုကို မိမိတို့ပတ်ဝန်းကျင်တွင် မြင်တွေ့နေရပေသည်။ ယခင်ကတည်းက အတုအစစ်ပြဿနာများ ပေါ်ပေါက်ခဲ့ဖူးသော်လည်း ယနေ့အချိန်လောက် ရိုက်ခက်မှုကြီးကြီးမားမား မဖြစ်ပေါ်ခဲ့ပါ။ စစ်တပ်အာဏာသိမ်းပြီးနောက်ပိုင်း ပြည်သူများအနေဖြင့် အရာခပ်သိမ်းလုံခြုံမှုမရှိခြင်းနှင့် ကုန်စျေးနှုန်းများ အဆမတန်မြင့်တက်နေသည်ဖြစ်ရာ ယခုငွေအတုအစစ်ကိစ္စရပ်ကို အာရုံထားလျှက်ရှိသည်။ ပိုဆိုးသွားသည်မှာ ဗဟိုဘဏ်မှ ငွေအတုများ ဘီလျံချီ ပျံ့နှံ့နေသည်ဆိုသော သတင်းများ ကျယ်ကျယ်ပျံ့ပျံ့ထွက်ပေါ်နေသောကြောင့်ဖြစ်သည်။ သတင်းမှားခြင်းမှန်ခြင်းကို အပထားပြီး ထိုသတင်းသည် ပြည်သူများအကြား ထဲထဲဝင်ဝင်ရေပန်းစားလာသည်။ 

ယမန်နေ့က နယ်မြို့တခုက ကုန်စုံဆိုင်လေးတခုတွင် ငွေငါးထောင်တန်နှင့် စျေးလာဝယ်သော အဝတ်အစားခပ်နွမ်းနွမ်းပြည်သူတစ်ယောက်ကို ဆိုင်ရှင်မှ ငွေအတုဟု ဆိုကာ ပိုက်ဆံ ငါးထောင်တန်အား အစားထိုးလှဲလှယ်ပေးရန် ပြောဆိုနေသည်။ သို့သော်ထိုသူ၌ လှဲလှယ်ပေးရန် ငွေသားအပို ပါလာဟန်မရှိ။ အတုမဟုတ်ကြောင်းသာ အတွင်တွင် ပြောဆိုနေရှာသည်။ ကျွန်တော်လှမ်းကြည့်လိုက်မိသည်မှာလည်း ပုံမှန်ကျွန်တော်တို့ သုံးနေသည့် ငွေသားတစ်ရွက်သာဖြစ်သည်။ ကျွန်တော်လည်း ထိုသူ၏အခက်အခဲကို ကျန်တော်တွင်ပါလာသော ငွေငါးထောင်တန်ဖြင့်ဆိုင်ရှင်ကျေနပ်အောင် လှဲလှယ်ပေးခဲ့ပြီး ဆိုင်မှ မိမိပစ္စည်းများယူကာ ထွက်ခဲ့သည်။ ထိုသူမှလည်း ကျေးဇူးတင်ကြောင်း အထပ်ထပ်အခါခါပြောကာ ထွက်သွားသည်ကိုတွေ့ရသည်။

ငွေအတုအစစ်ဂယက်သည် မိမိမျက်လုံးရှေ့တွင် ကိုယ်တွေ့မြင်မှသာ ယုံနိုင်တော့သည်။ ယခင်က ထိုပြဿနာသည် ကြီးမားလိမ့်မည်ဟု မထင်ခဲ့ပါ။ ယခင်ကလည်း အတုအစစ်ဆိုပြီး ငြင်းခုန်ခဲ့ကြသေးသည်။ အခြေခံလူတန်းစားများ၏ တနေ့ဝင်ငွေသည် ငွေကျပ်ခြောက်ထောင်နှင့် ရှစ်ထောင်ကျပ်ကြားတွင်ရှိရာ ငွေအတု ငါးထောင်ကျပ်တန်တစ်ရွက်ပါလျှင်ပင် သူတို့အတွက် အဆင်မပြေတော့ပါ။ ငွေအတုအစစ်ကို ဘဏ်များမှာသာလျှင် ခွဲခြားလေ့ရှိခဲ့ပြီး အတုမှန်ပါက ဘဏ်မှ တရားဝင်ဖျက်ဆီးသိမ်းဆည်းထားလိုက်သည်သာ ဖြစ်သည်။ ယနေ့တွင် ငွေအတုအစစ်ဂယက်ကြောင့် ပြည်သူလူထုကပါ ကြောက်စိတ်များ ဖုံးလွှမ်းနေပြီး ငွေအတုများ လက်ဝယ်ရောက်ရှိနေမည်ကို စိုးရိမ်လျှက်ရှိသည်။ ထိုသို့ အတုအစစ်ခွဲနည်းဆိုပြီး လူမှုကွန်ယက်ပေါ်နှင့် တဆင့်တစကားများကို အခြေခံကာ ခွဲခြားနေသည်မှာ မှန်ကန်သော လုပ်ရပ်မဟုတ်သည့်တိုင် စိုးရိမ်စိတ်ကြောင့် ပြုလုပ်နေခြင်းမှာ အခြေခံစားလူတန်းစားများအတွက် ရင်လေးစရာဖြစ်သည်။ ငွေအတုအစစ်အမှန်တကယ် ခွဲခြားတတ်ခြင်းမဟုတ်ပဲ အမှားနည်းလမ်းဖြင့် အမှားများကိုသာ လုပ်ဆောင်နေမိမည်ကို စိုးရိမ်မိပါသည်။ 

အာဏာသိမ်းပြီးနောက်ပိုင်း အစစအရာရာ မလုံခြုံသောဘဝတွင် ပြည်သူများမှာ သောကမကင်းဖြစ်နေရပြီး ထိုသို့ပြုလုပ်နေသည်ကိုလည်း အပြစ်မဆိုသာပါ။ အာဏာသိမ်းမှုကြောင့် ကုန်စျေးနှုန်း၊ လောင်စာဆီစျေးနှူန်း စသည်တို့ ကြီးမြင့်နေသည်မှာ လူတန်းစားအလွှာပေါင်းစုံကို ရိုက်ခက်လျှက်ရှိသည်။ အဆိုးဆုံးအခြေအနေတွင် အောက်ခြေလူတန်းစားများပင်ဖြစ်သည်။ ငွေအတုအစစ်ဂယက်သည်လည်း  ထိုသူတို့အပေါ်ပိုမိုရိုက်ခက်သည်ကို မြင်တွေ့ရသည်။ “အရင်းကိုစစ်လျှင် အမြစ်ပေါ်” ဆိုသည့်အတိုင်း ယနေ့ဖြစ်ပွါးနေသော ပြည်သူတို့၏ ဒုက္ခအရပ်ရပ်သည် အာဏာသိမ်းခြင်း၏ အကျိုးဆက်သာ ဖြစ်ပါတော့သည်။ ထို့ကြောင့် ပြည်သူများအနေဖြင့် တော်လှန်ရေးအသိမြင့်မားစွာ သတိကြီးကြီးထား၍ “လက်သည်းဆိတ်က လက်ထိပ်နာ” ဆိုသည့် ပမာအတိုင်း မိမိနေရာတွင် အနေသာသော်လည်း စစ်ဒဏ်ဆိုးရွားသည့် နေရာများကို ပုံသဏ္ဍာန်မျိုးစုံဖြင့် ကူညီပံ့ပိုးကြရန် တိုက်တွန်းအပ်ပါသည်။ ယနေ့ မြန်မာပြည်တွင် ဖြစ်ပေါ်နေသော ဒုက္ခပေါင်းစုံ၏ ဖြေရှင်းရန် တစ်ခုတည်းသော နည်းလမ်းမှာ စစ်အာဏာရူးများ မြန်မာ့မြေပေါ်မှ အပြီးတိုင်ပျောက်ကွယ်သွားရမှာဖြစ်ကြောင်း တင်ပြလိုက်ပါသည်။